Het gung der aordig um weg bij de streektaolstried in De Voorhof in Börk . Met 103 dielnimmers was de zaal vrijdagaovend goed vuld. De 26 teams waren klaor um de stried met mekaar an te gaon.

Lang leek het erop dat het team van de gemiente Midden-Drenthe met de winst op hoes an gaon zul, maor nao de achtste vraogenronde bleek dat er drei teams met 47 punten bovenan stunden: Beilervaort, Börk 1 en Drieber. Een benaderingsvraog maakte oeteindelijk dat het team van Beilervaort de eerste pries ophalen much.

De vraogen gungen over allerlei underwarpen, zoas Drentse spelling, Drentse gezegden, maor ok Drentse karken kwamen an bod. De dielnimmers mussen het beste beentie veur zetten um alles goed te beantwoorden.

Het team met de minste punten, Witteveen, wun de poedelpries en hef daormet volgend jaor febrewaori recht op een broescursus Drents. Daormet komtze bij de volgende editie van de Streektaolstried beter veurbereid an de start .

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers wies met bint en die de niet-gebroekers waardeert. Elk jaor organiseert de vrijwilligers van Midden-Drenthe de Streektaolstried: een Drentse pubquiz waorbij leuke priezen te winnen bint.