Is ’t jullie ok opevallen dat dizze maond een biezundere maond is? ’t Kan oe haoste niet ontgaon weden. Zölfs de Baos hef ’t mitekregen. Vleden weke verzochtte hij inies: ‘Poeh …! Ze wilt wel weten bij ’t Huus van de Taol of niet. Wat een drokte maakt die lui hé. Dan gaot ze weer in ’t Drèents veurlezen op de basisschoelen en nou lees ik dat der op 21 Meert een Drèentse middag is in de bibliotheek.’ Ik heb ‘m mar even rap dudelijk emaakt dat dizze maond uuteroepen is tot Meert Streektaolmaond. En dat der dus van alles organiseert wordt op ’t gebied van streektaal.
‘Baos, dat weej toch wel? Der is ja ok elke dag een oflevering van LOOS op de tillevisie. Daor hew veurig jaor ja zölf an mitedaone.’ Waorop zien oogies ondeugend begunden te straolen. Dat was nog ies een barre mooie ervaring … veur hum dan welteverstaon.
Vleden jaor wa’k namelijk evraogd o’k mit wol doen an de quiz LOOS bij RTV Drenthe. Dat leek mij barre mooi. Weken van teveuren wa’k drok mit de veurbereidings. Ik keke alle veurgaande ofleverings, har een bulte Drèentse boeken elezen en wus alles van de geschiedenis van Drenthe (dochtte mij).
De opnames waren ’s aovends. ‘Za’k mit oe mitgaon mien doefie?’ zee de Baos. ‘Het lek mij wel mooi umme oe te zien schitteren. Ie gaot vaste winnen en zo’n belangrieke vrouwe mut natuurlijk wel weer veilig thuuskomen. Dan bin’k ja gelieks oen privé chauffeur.’ Dat leek mij wel een goed idee.
Toen wij in de studio ankwamen, zagen wij een paar goeie bekenden zitten. Juf Diana en mien vriendin Henderkien hadden zich ok opegeven veur de quiz. En ok zij hadden allebeide iene mit enèumen umme terogge te rieden. Ik ware beneid wie van oons het stuur in de haanden kreeg op de terogweg.
Nou! Dat za’k oe vertellen.
Diana en Henderkien waren as eersten an de beurte en zij overleefden mit glaans de eerste ronde. Poeh. Poeh. Poeh. Wat waren zij goed. Mij begunde de moed al wat in de schoenen te zakken. En toen mus ik …
Al mien vergaarde kennis over Drèentse schrievers, uutspraken, burgemeisters en wetholders, feestdagen en olderwetse gebruuken … ’t was allemaole verspilde muite. Want dat Wespert Westdorp is en der een Wallaby ontsnapt is uut Wildlands … nooit eweten. Mien puntentotaal much dan ok gien pochen lieden. Ik lagge der nao de eerste ronde metiene al uut.
Hielemaolt van ’t rabbat leup ik terogge en wördde ik opewacht deur de rest. Zij lagen allemaolt krom van ’t lachen, behalve de Baos dan. ‘Wij lacht oe niet uut heur’, zee Henderkien. ‘Mar oen keerl is net evraogd of hij ok mit wil doen an de quiz. Der is ter iene niet op komen dagen.’ Ik wus niet wa’k heurde. Baos en een spellegie? En ok nog op tillevisie? ’t Leek mij niet goed toe.
10 seconden later was zien kop al epoeierd en kun hij zich opmaken veur zien debuut. En merakels nog an toe. Wat was de Baos goed hé. D’iene nao
d’aandere vraoge wus hij te beantwoorden en dat zunder veurbereidings. Hij haalde de mieste punten!
Zo trots as een pauwe leup hij terogge en wördde hij opewacht deur de rest. Zij lagen allemaolt krom van ’t lachen en ikke nog het miest. As een boer mit koezenzeerte dan hè. Dat snap ie wel.
Later, op weg naor de auto drokte Baos mij de sleutels in mien haanden en mit een: ‘Niet alle oelskukens wordt wieze oelen mien oggeltie’, kun ik het er weer mit doen.
(Uut pure frustratie he’k der d’aandere dag een gedicht over eschreven. Ie mut toch wat mit oen verlies)
LOOS
Sem de Schildpad was hiel wies
de wiesneus uut zien klasse
zien juf zee plotsklaps op een dag
‘Sem, griep oen jas en dasse,
wij gaot naor de studio
veur een kwis in Assen
en bin ie wies, dan kriej een pries
dus gaot oons mar verrassen’
Sem kreeg ’t daor hiel arg benauwd
en was niet best te passe
de camera’s dreiden, zij zagen hum zweien
under zien stoel daor lag een plasse
Sem de Schildpad was hiel wies
de wiesneus uut zien klasse
zien angst was starker dan de pries
hij was der niet tegenop ewassen
Nou moi hè!
Yvonne Bijl-Hooijer
