Niks um ’t lief? Dan hej toch zekers een koopmotief!

‘Hej de goed wies kepot of zo?’ raosde de Baos lèestdaags op oonze vrije vrijdagmiddag. Vanuut de gang staampte hij op hoge poten de kamer in. Ik was net drok bezig een paar takkies varse munt uut de diepvries in mien theeglas te soppen. En schrökke mij het leplazerus van zien gebèul. En de bladties ok. Die sprungen zowat uut mien koppie asof zij zich braandden an ’t kokendhiete water.

Midden in oonze huuskamer stund hij dreigend veur mij. Mit een groot pakket in zien beide kolenschuppen eklemd. Mien harte mèuk een sprongegie toen a’k dat zag. Umme dat pakket natuurlijk hè! Niet umme de anblik van mien kwaoie keerl. Dat begriep ie zekers weh. Paniekerig vrèug ik mijzölf of hoe of’k mij hier weer uut mus redden.

‘Aaah, mien pakken bint der’ jubelde ik. ‘Mooi op tied. Kan’k der mooi ientie an doen a’k morgen veur gao dragen bij ’t Huus van de Taol.’

Geïrriteerd schudde de Baos een paar keer wild mit zien kop asof hij last had van breinblubber. ‘Pakken??? Vrouw Biel! Vien’j ’t vrömd da’k hier niks, mar dan ok niks van snappe? Volgens mij hej veurige weke ok al twei pakken besteld. Ie wilt mij nou toch niet vertellen daj der vanneis twei ekocht hebt?’

Mit een schieterig lachie keek ik hum an. Want ja! Dat ha’k wel edaone! Veurige weke zag ik op Facebook een vrouwgie op een foto in een prachtig okergeel pak. Mien neisgierigheid wakkerde an as ’t vuur in oonze verstopte kachel, veurige weke. Belangstellend klikte ik op ’t plaatie. Nog meer pakken in verschillende kleuren verschenen veur mien hebberige blik.

Donders! Wat mooi! dacht ik bij mijzölf. Die kleuren! En wat goedkoop! Die mu’k hebben.

Normaal esprèuken bin’k niet van ’t bestellen via Internet. Starker nog: ik bin der faliekant op tegen!. Mar veur mien eigen koopie mèuk ik graag een uutzondering. Ik zöl eigenlijks een dief van mien eigen portmennee weden a’k ’t niet deu. En dat mag nooit. Zeg nou zölf!

Binnen twei minuten ha’k een bestelling eplaatst. En omda’k deur de bomen ’t bos niet meer zag, gelieks mar twei. Een zwarte en een oranjege kleur. Dan zöl’k niet opvallen in ’t bos, zeg mar. Niet da’k mit zo’n prachtig pak ooit in ’t bos zöl lopen. Mar goed. ’t Kön weh.

Een paar dagen later wördden de pakken bezorgd en lèup ik trots en tevreden deur de kamer te paraderen.

‘Muj ies zien Baos. Wat mooi of nie. En ok nog ies niet duur.’

Hij legde zien kraante opzied en bestudeerde mij andachtig. Asof hij Sherlock Holmes was. Mar dan zonder vergrootglas. En zonder piepe. Bewondernd gleed zien blik van top tot tien. En van kop naor konte.

‘Zo hé! Wat he’k toch een knap wiefie’ slijmde hij. Al ha’k mien haor in een flodderig fotsie, wallen onder de ogen zo diep’ as de Atlantische Oceaan en zat der een kilo spinazie tussen mien taanden. Mit mooie kleren umme d’hoed bi’j asnog de man. Of de vrouw, in mien geval. Wat aj tegen genderneutralen zegt, wee’k eerlijk gezegd niet.

Anestèuken deur zien enthousiasme beslèut ik ter plekke umme ok het okergele en het legergruune exemplaar te bestellen. Ze waren ja zo mooiiiii. En ’t was ja niet duur. En daor wo’k altied zoooo giga gloepends graoperig van. Ik kan ’t niet hölpen …

En nou he’k der dus veiere. Waor a’k allerbàrstens bliede mit binne. Mar waor de Baos hielemaolt niks van snapt. En evenpies onder oons …’t Was eigenlijks ok niet de bedoeling dat hij lèestdaags dat pakket onder d’ogen kreeg heur. Want der zat niet allent een gruun en een geel pak in.

’t Vest, de jasse en de bloesies he’k verstopt onder in mien kaste. Achter mien zomerkleren. En eh! Ie zölt mij nou wel een linkmiegel vienden, mar ik wachte nog evenpies mit ‘t antrekken van mien neie goed. Totdat de Baos niet meer verniendig is. En omdat hij altied dolgelokkig wordt van een flinke portie spare ribs, ète wij dat vanaovend. Dan is hij bèter te passe. En dat komp mij bèter uut. Vanzölf. Ik kan die jasse ok niet laoten liggen tot volgend veurjaor, toch?

 

Nou moi hè!

Yvonne Bijl-Hooijer

yvonnebijl.nl

 

(Klein vraogie: Wilt jullie mien geheimpie niet tegen de Baos verklappen? Want tja! Hoe mur ik mij daor nou weer uut redden …!)

Deel dit bericht!

Geef een reactie